بڕوا كه‌مال
لە قورئانی پیرۆز دەستەواژەی (غفور) هەمیشە بۆ، لیخۆش بوونی گوناهو تاوان هاتوە و داپۆشینی گوناه، بەلام وشەی (کفر)یش هەر بۆ داپۆشین بەکار دێت، بەلام جیاوازیان چیە؟
وشەی (غفور) لە چاوگی(غفر)ە هاتووە، ڕاغیبی ئەسفەهانی دەلێت: وشەی الغَفْرُ: إلباس ما يصونه عن الدّنس. واتە: داپۆشینی شتێک بۆ ئەوەی لە چڵک و پیسی بیپارێزی، بۆ نموونە: لە ماڵەوە تەلەفیزۆنێک هەیە، کۆمپیتەرێک هەیە، دای ئەپۆشی بۆئەوەی پیس نەبێ، یان تەپو تۆزی لێی نەنیشیت.
ئەگەر بێن سەیری وشەی(کَفّر) لەچاوگی(کُفر) هاتووە یانی ( ستر الشيء وتغطيتُة) داپۆشینی شتێک، جا کاتێک داپۆشین ڕوو دەدات کە کرداری داپۆشین هەبێ، بۆیە بە جووتیار دەگوترێ:(کافر) چونکە گەنم و دانەوێلەدەخاتە ژیر خاکەوە، دەیشارێتەوە، بە (شەو) دەگوترێ (کافر) چونکە بەتاریکی رووناکی دادەپۆشێت. جا جیاوازیی نێوان وشەی (غفر) و (کفر) ئەوەیە کە (کفر) شتێک دادەپۆشی لەبەر ئەوەی ڕقت لییەتی و حەزناکەیت دەربکەویت، بەلام وشەی(غفر) شتێک دادەپۆشیت لەبەر ئەوەی خۆشت دەوێت و ناتەوێت خراپ بێت، جا خوای گەورە (غفُور)ە واتە: ئەوانەی کە تەوبە دەکەن و دەگەڕێنەوە بۆ لای خوا، خۆشیان دەوێن و لە سزایان دەپارێزێت و دایاندەپۆشێت بۆ ئەوەی تووشی سزا نەبن. (رَبَّنَا اغْفِرْ لَنَا ذُنُوبَنَا وَإِسْرَافَنَا فِي أَمْرِنَا وَثَبِّتْ أَقْدَامَنَا وَانصُرْنَا عَلَى الْقَوْمِ الْكَافِرِينَ) خوایە نەک لیمان خۆشبە بەلکو دامان پۆشە بەڕەحمەت بۆئەوەی لەسزاکان پاریزراوبین.
