له دوو تووێی (500) لاپه‌ره‌و له به‌رگێگی قه‌شه‌نگدا به‌رگی پێنجه‌می ئینسكلۆپیدیای كوردو كوردستان چاپ و بڵاوكرایه‌وه.
ئینسكلۆپیدیای كوردو كوردستان، كه پرۆژه‌یه‌كی فه‌رهه‌نگیی و زانستیی گه‌وره‌ی ڕێكخراوی زانسته بۆ باس و توێژینه‌وه‌و لیژنه‌یه‌كی پسپۆر سه‌رپه‌رشتی ده‌كات، به‌م به‌رگه‌وه تا ئێسته پێنج به‌رگی لێ ئاماده‌كراوه‌و بڵاوكراوه‌ته‌وه‌و به ده‌یان نووسه‌رو ئه‌كادیمیی له هه‌ر چوار پارچه‌ی كوردستان تێیدا به‌شدار بوون و سه‌دان ناونیشانی جۆراوجۆری په‌یوه‌ست به كورد وه‌ك نه‌ته‌وه‌و كوردستانی گه‌وره‌ی له‌خۆ گرتووه.
له به‌رگی پێنجه‌مدا (51) نووسه‌رو ئه‌كادیمیی تێیدا به‌شدارن و (96) وتاری زانستیی بڵاوكراونه‌وته‌وه، (42) وتاریان ته‌رخان كراوه بۆ به‌شی یه‌كه‌می ئینسكلۆپیدیا، كه تایبه‌ته به (كه‌سایه‌تییه‌كان) و به‌شی دووهه‌میش كه (34) وتاره تایبه‌ت كراوه به (شوێن و گونده‌كانی كوردستان) و به‌شی سێهه‌میش (20) وتاره كه تایبه‌تن به بابه‌ته‌كانی ئاین و ئاینزاو ئه‌ده‌ب و زمان و كولتور.
ئه‌م به‌رهه‌مه ناوازه له پێشانگای نێوده‌وڵه‌تیی كتێب له هه‌ولێر به‌رده‌ست ده‌بێت.
له ئێستادا رێكخراوی زانست بۆ باس و توێژینه‌وه‌و لیژنه‌ی ئاماده‌كاری ئینسكلۆپیدیای كوردو كوردستان ئاماده‌كاریی بۆ به‌رگی شه‌شه‌م ده‌كه‌ن و چاوه‌ڕێی وتارو نووسینه زانستییه‌كانن.
